contact@gotvimesofico.mk

15
ное

Рижото со тиква

Во овој период од годината тиквата ми е хит! Ја ставам во секакви рецепти. Случајно ми текна на еден италијански класик, рижото со тиква и суви домати! Е сеа вака, кога се збори за рижото, прво треба да се знае дека рецепт за рижото не постои, тоа е процес, техника која мора да се запази. Најбитно во секое рижото е течноста да ја додавате споро за оризот да може поспоро да ја абсорбира и да ви остане ал денте – каков што треба да биде. И цело време мешате (со дрвена лажица), тајната на секое рижото е постојаното мешање, не смеете да оставите да ви избие течноста на површина, а оризот да падне на дното. Така не дај боже може да загори! :) А и доколку готвите на тој начин, значи дека никогаш не сте зготвиле традиционално рижото. img_0020Кога бев последен пат на обука во Италија, мојот тутор, шеф Роберто ми вика: “Филип, рижотото е готово, кога е готово! Не постои време, се зависи од течноста која ја користиш и сортата на ориз со која работиш. Секогаш бирај ги најквалитетните состојки кои можеш да си ги дозволиш, тоа тајната на секое перфектно јадење!” – Па така јас секогаш работам со карнароли ориз и го бирам најдобриот ориз на светот! Некој ќе каже, еј тие оризи се скапи, не се скапи, туку се јадат во мали количини. На пример за ова јадење (за двајца) ви е потребно 100-120гр ориз карнароли, потоа една шолја пире од тиква, 1/4 главица кромид, 3 чешниња лук, малку маслиново масло, 250мл пилешки бујон, 40гр путер, малку пармезан и малку суви домати за декорација.img_0021img_0022Па така, на маслиново масло (околу 3 лажици) го ставате кромидот да се издинста, откако ќе добие стаклест изглед му го додавате лукот и мешате постојано за да се зготват без да почнат да загоруваат, вие ја имате контролата. Потоа го додавате оризот, додавате 40гр путер и мешате за да се глазира, откако оризот ќе ја абсорбира целата маснотија, додавате 50мл бело вино (препорачувам пино гриџио или било кое бело суво вино) мешате за додека не испари алкохолот и потоа додавате неколку лажици бујон и неколку лажици пире од тиква, мешате додека не се соединат со оризот. Овој процес со додавање пире од тиква и бујон го повторувате додека оризот не е тврдо варен. Доколку сакате да го послужите ал денте морате да внимавате и на времето откако ќе го тргнете од рингла, затоа што тој продолжува да се готви. Тука морате да предвидите дека треба да биде пред ал денте варен за да дојде на посакуваната тврдост.

Овде е моментот кога можете да додадете сецкана жалфија. – Ова е опционално, не морате, само доколку сакате.img_0024Откако ќе оцените дека е добро сварен за послужување, го тргате тенџерчето од рингла и додавате една полна рака рендан пармезан. Мешате да се соедини и да го врзе оризот. Внимавајте рижотото мора да биде кремаво, но не смее да ја изгуби структурата, значи треба да се погрижите да го наштелувате до перфекција. Во никој случај не смее да биде суво! Тоа е грешка.

Јас го сервирав со сецкани суви домати и излезе одлично! 

Направете го и пишете ми како ви излегло! 😉 Поздрав! :)fic_0464

2 Коментари

Остави коментар